Bekebun Bigi Kepade Kesihatan.

Rege sebidang tanah di tapan aku makini kak larang nian, mon dibandingke dingan sepuluh taun yang lalu. Rege sebidang tanah seluas 0.4 hekter/1 ekar, sepuluh taun dulu lagi boli dapat dibeli sekitar RM20,000 kalu duit Rp sekitar 50 jutaan la. Kalu makini la die dapat lagi 0.4 hekter itu la rege sampai RM80,000. hampir 200 jutaan rupiah, pade hal lokasinye jauh jak kota. Asekku kerane tanah la dakgi  lagi, la abis gale dipunye oli wang.

Reken e tu mon ade tanah te, bigi la diusahake jangan unyuke nye terbiar semak woi rugi nian dak. Carek nyadinye te die pule sego, arai2 diulangke kebun tu, mon nye semak rumputke, sabitke kalu lagi tedaya pakai mesin sandang pemotong rumput te mesinke, asekku kebun selibo 0.4 hekter bersih gale.

Tanam bae la ape2 pokok yang cocok dingan tanah te. Ape pokok rambutan, manggos, cempedak, nangke, ape pokok durian boli gale..mon pokok jering/jengkol col paya ditanam nye tumbuh sendiri, mudah idup dimane mane, jak mane paro datangnye ?..hehehe.

Mon pokok2 la beso gale, la bebua, cantik nian kebun kite te, bile datang kekebun ati senang fikiran lapang, sambil nyedut udara bersih, sejuk jak pokok2 te. Mon ade rumput selai due tumbuh te, ambik sabit, disabit ke kayak wang main golf di padang golf dak. Kalu die idang sarai, lat2 arai datang ke kebun te, belan dalam due atau tige jam, unde bekal ayo, bebuak pule dikit, lesai belan te, istirehat sambil neron dalam kebun, woi lemak nian, ape lagi mon pokok2 tanaman kite te la bebua, sambil mungut, sambil nyicip buahnye.

Terasek nian segarnye, peluh keluao sehat, penghasilannye pule ade, kalu lebat pule buahnye dapat pule bebagi dingan sanak, jiran sedekat uma, kan bigi nian te dak. Mudah2an kite betambah sehat dan rezeki pule banyak.